AJJC ku konferensia pa prevení i kombatí kriminalidat bou di hobennan

“Ta na henter un pueblo pa eduká un yu”

WILLEMSTAD – Djabièrnè 16 di mei último “Stichting Ambulante Justitiële Jeugdzorg Curaçao”  (AJJC) a tene un konferensia pa  mas o menos 60 diferente entidat ku ta traha riba tereno sosial, edukashon, enseñansa  i hurídiko pa asina duna informashon tokante AJJC su tareanan, metanan i tambe pa stimulá un konvenio di trabou entre e entidatnan.

Durante e konferensia titulá “It takes a village to raise a child” a pone énfasis riba e 3 areanan di trabou ku AJJC tin kual ta Jeugdreclassering, HALT i Veiligheidshuis. Alabes a enfoká riba e importansia di traha huntu ku tur e entidatnan konserní pa asina logra e meta pa kombatí i prevení kriminalidat bou di hobennan na Kòrsou. E oradornan ku a trese un presentashon durante e konferensha tabata Fiskal señora mr. Ludmila Forbes-Vicento, miembro di e tim di maneho di SDKK señor Richenel Martina, direktor di AJJC señora Mildred Francisca i tambe trahadonan sosial spesialisá riba e area di Jeugdreclassering Viandrelica Narcisio i Jolissa Augusta. Por último Minister di Hustisia, señor mr. Nelson Navarro a lansa e wèpsait di fundashon AJJC kual ta www.ajjc.org.

Stichting AJJC

Dia 15 di novèmber 2011 e lei penal hubenil a drenta na vigor. Pa motibu di esaki Ministerio di Hustisia a skohe pa  funda Stichting Ambulante Justitiële Jeugdzorg Curaçao (AJJC) na desèmber 2013 i pa febrüari 2014 ela bira operashonal. AJJC a keda enkargá ku e tareanan di Jeugdreclassering, Halt i Veiligheidshuis según tareanan stipulá den e Kódigo Penal Hubenil. E lei penal ta trata spesialmente kastigunan pa menornan di edat entre 12 aña i 18 aña ku a drenta den kontakto ku Hustisia. Den lei ta indiká ku Jeugdreclassering i Halt ta enkargá ku ehekushon di e leinan aki.

For di febrüari 2014 trahadonan di AJJC a kuminsá traha riba e diferente kasonan enkuanto menornan di edat ku a drenta den kontakto ku Polis i Hustisia i ku a risibí un medida.  E medida ta nifiká ku Jeugdreclassering tin e tarea pa duna guia obligatorio na e hobennan. Meta di e guia ta pa nan kumpli ku nan straf i tambe pa minimalisá e riesgo di e menor di edat pa no kai mas den man di Polis i Hustisia. Den apenas 3 luna di tempu ya Jeugdreclassering tin un kantidat di mas ku 40 kaso di kua 70% ta kasonan aktivo.

Jeugdreclassering a inisiá un investigashon preliminar riba e profil di e hobennan ku ta bou di nan guia. For di e investigashon aki Jeugdreclassering ke saka entre otro e diferente tendensianan ku tin bou di e hobennan, haña un bista riba nan problematika, e orígen di e problema, e diferente faktornan di riesgo i nan situashon i ambiente sosial-emoshonal. Meta di e investigashon aki ta pa entre otro desaroyá métodonan aplikabel i pa duna un bista aktual di e problemátika di kriminalidat bou di hobennan. Jeugdreclassering lo publiká e resultadonan despues di finalisashon di e investigashon preliminar.

HALT ta para pa “E Alternativa”. Meta di Halt ta pa traha riba e parti preventivo. Halt ta  pone èkstra atenshon riba menornan di edat ku ta òf por kore e riesgo di bini den kontakto ku Polis i Hustisia. AJJC aktualmente ta den e fase di preparashon pa hasi e parti aki operashonal.

Den e luna di aprel 2014 AJJC a kuminsá establesé kontakto ku diferente entidatnan importante pa asina por hasi HALT funshonal. Entretantu Universidat di Kòrsou lo kuminsá ehekutá un enkuesta bou di alumnonan i maestornan di grupo 8 (skol básiko) i di promé grado di skol avansá. E enkuesta aki ta pa duna un bista riba nan preparashon i desaroyo emoshonal, sosial i kognitivo di manera ku HALT por desaroyá trayektonan di guia. Entre tantu  HALT a kuminsá traha riba 2 “test case” huntu ku entidatnan konserní.

Veiligheidshuis ta un nètwèrk entre partnernan riba e tereno hudisial, enseñansa i riba e tereno di kuido ku ta bini huntu pa atendé ku problemanan kompleho di e hóbennan menor  di edat.  E meta ta pa kombatí i prevení kriminalidat bou di e menornan di edat. E partnernan ta deliberá e kasonan i ta yega na un plan di guia  pa huntu  ehekutá esaki.

AJJC ta kere ku formashon no di nos hóbennan no solamente ta un tarea di Gobièrnu, despues ku su mayornan a kai afó, sinó ku e ta e responsabilidat di henter komunidat. “It takes a village to raise a child” (Ta na henter un pueblo pa eduká un yu) – Proverbio Afrikano.